ကျောင်းအေးအေးဆေးဆေး ပိတ်ထားတုန်းလေး ကိုယ်သိပ်အားမသန်ခဲ့တဲ့ စာအုပ်တွေဘက် လှည့်ဖြစ်ခဲ့တယ်။

ဒီတစ်ခါတော့ ဆရာဖေမြင့်ရဲ့ “လူနာဆောင်အမှတ်ခြောက်” စာအုပ်လေးကို ဖတ်ကြည့်ဖြစ်ခဲ့တယ်။

ဆရာ့ရဲ့ အရေးအသားကို အကြာကြီးနေမှ ဒုတိယအကြိမ်အဖြစ် ပြန်လည်ထိတွေ့တဲ့သဘောမို့လား မသိဘူး။ အရင်က သိပ်စိတ်မဝင်စားခဲ့တဲ့ ဆရာ့စာအုပ်တွေကို ဆရာ့ရဲ့ ဘာသာပြန်စွမ်းရည်ကြောင့် နောက်ထပ် ဆက်ဖတ်ကြည့်ချင်စိတ်တွေ ဖြစ်လာစေတယ်။

ဘာသာပြန်ဝတ္ထုတွေထဲဆိုရင် ဆရာသင့်လူကို ပိုသဘောကျတတ်ပေမယ့် ခုတော့ ဆရာဖေမြင့်ရဲ့ ဘာသာပြန်စွမ်းရည်ကို ပိုလေးစားခုံမင်သွားတယ်။ မြန်မာလို ဖတ်ရတာတောင် ဝေါဟာရကြွယ်ဝမှုတွေ၊ ဘာသာပြန်လက်ရာ ပါးနပ်ကျွမ်းကျင်မှုတွေကို မကြုံစဖူး ကြုံလိုက်ရသလိုပဲမို့ တော်တော်သဘောကျသွားတယ်။

စာအုပ်နာမည်က “လူနာဆောင် အမှတ်ခြောက်”တဲ့။ စိတ်ဝေဒနာရှင် တက္ကသိုလ်ကျောင်းသားတစ်ဦး အိုင်ဗင်ဂရိုမော့ဗ် နဲ့ ဒေါက်တာ ရာဂင်တို့ အပြန်အလှန်ဆွေးနွေးငြင်းခုံမှုတွေထဲကနေ ၁၈၀၀-၁၉၀၀ အကြား ခေတ်ကာလတစ်ခုရဲ့ ရုရှားတောကျေးလက် လူနေမှုအဆင့်အတန်းကို အများကြီး ဖော်ပြသွားတယ်။ စာဖတ်သူတွေကိုလည်း ရာဂင့်ရဲ့နေရာကို ရောက်မှန်းမသိရောက်အောင် ဆွဲခေါ်သွားခဲ့ပြီး ရာဂင့်လိုပဲ မှားယွင်းတဲ့ တွေးခေါ်ယုံကြည်မှုတွေကိုလည်း ရိုက်ချက်အပြင်းဆုံး သင်ခန်းစာတစ်ခုနဲ့ မှန်ကန်အောင် ပြုပြင်ပေးခံရသလို ခံစားမိစေခဲ့တယ်။

အကြိုက်ဆုံး သင်ခန်းစာတစ်ခုကတော့ ကိုယ့်ပတ်ဝန်းကျင်က စိတ်ရောဂါဝေဒနာသည်တွေကို ဘယ်လို မှန်ကန်စွာ ပြုမူဆက်ဆံသင့်တယ်ဆိုတာကို ကောင်းကောင်းကြီး ချပြသွားခဲ့တာပါပဲ။ #တစ်ခါတစ်လေကျ ကျွန်မတို့တွေဟာ သူများဝေဒနာခံစားနေရတာကို တွေ့ရင် ဥပေက္ခာပြုတတ်ဖို့ ၊ တစ်ချိန်ချိန်မှာ မြေကြီးထဲ ရောက်သွားရမယ့် လူတွေချည်းပဲမို့ နာကျင်မှုကို အရေးတယူလုပ်မနေမိစေဖို့ အမှတ်တမဲ့ဖြစ်စေ…တခုတ်တရဖြစ်စေ နှစ်သိမ့်ဖေးမတတ်ကြပါတယ်။ တကယ်တော့ ဝေဒနာဆိုတာ ရာဂင် အနိစ္စရောက်ခါနီး ကြုံတွေ့ခဲ့ရသလိုမျိုးပါပဲ…။ ကိုယ်တိုင်ကြုံတွေ့ခံစားရပြီဆိုမှ ဝေဒနာဟာ စကားလုံးတွေလောက်နဲ့ ပျက်ပြယ်သွားမယ့် ဒဏ်ရာအတိမ်အနက်မဟုတ်တော့တာကို သိလာရတယ်။ အဲ့ဒီအခါကျ အချိန်တွေ နှောင်းသွားခဲ့ပြီလေ…။

ဘာပဲဖြစ်ဖြစ် ဒီစာအုပ်လေးကို ရွေးချယ် ဖတ်ဖြစ်ခဲ့တဲ့ ကိုယ့်ကိုယ်ကိုယ်လည်း ကျေးဇူးတင်မိပါတယ်။ ဆရာဖေမြင့်ရဲ့ တခြားစာအုပ်တွေကိုပါ ထပ်ဖတ်ကြည့်ဖို့ အားယူရင်း ဆရာ့စာအုပ်ကို မဖတ်ဖူးသေးတဲ့ တချို့မိတ်ဆွေတွေကိုလည်း ဒီစာအုပ်လေးဖတ်ကြည့်ဖို့ တိုက်တွန်းချင်ပါတယ်။

ကျေးဇူးတင်ပါတယ်။ . . . #ချစ်ခင်လေးစားစွာဖြင့် #အိမ့် Fri, Oct 2, 2020