“ပြည်ကြီးတန်ဆာပင်ဖြစ်လင့်ကစား ..တဲ့၊ မိခင်သည် မိခင်သာတည်းတဲ့၊ လူသတ်ဓားပြပင် ဖြစ်လင့် ကစားဖခင်သည်ဖခင်သာတည်းတဲ့၊ နား လည်လား”

“ပြည်ကြီးတန်ဆာဆိုတာဘာလဲမာမီကြီး"

-နေနွယ်ဇင်မြင့် -အဆိပ်သင့်မေမေ

နေညိုရီတဲ့...။ ကဗျာဆန်ဆန်နာမည်လေး...။ စာရေးဆရာတွေနာမည်ပေးတဲ့ တောကမိန်းကလေးပေါ့...။ နာမည်လေးအတိုင်း ဖြူစင်အိဖွေး ကြည့်မဝအောင်လှရက်နိုင်တဲ့ပန်းကလေး...။

လှပခြင်းဟာ ချမ်းသာသူအတွက် ဂုဏ်သရေဖြစ်ပြီး၊ဆင်းရဲသူအတွက်ဒုက္ခတွေပဲဖြစ်စေသတဲ့။

ပန်းကလေးနေညိုရီဟာလည်း ဖူးငုံဘဝကနေ ပွင့်အာတော့မည့်ဆဲဆဲ အချစ်လို့ ခေါင်းစဥ်တပ် မြေနိမ့်ရာ လှံစိုက်ချင်သော မဟာပုရိသ ဖိုသတ္တဝါတို့ လက်တွင်း ဘဝ၏ အလှပဆုံး ဖူးရစ်ငုံဘဝနဲ့ပင် ကြွေကျခဲ့ရတော့တယ်။ . . . အမည်းစက်ကြီးတစ်ခုကိုပိုက်ထွေးရင်း အရိပ်မည်းကြီးတွေလက်ကရှောင်ပြေးရင်း နေညိုရီဟာလည်း အရိပ်အာဝါသတစ်ခုကို ရှာတွေ့ခဲ့တော့တယ်။

အရိပ်ပေးတဲ့တိမ်တိုက်လေးဟာ "အစ်ကို"တဲ့။

ပညာအရည်အချင်း နှစ်တန်းအောင်ရုံသာရှိတဲ့နေညိုရီဟာ အစ်ကို့ကြောင့်ပဲ အသိအလိမ္မာတွေတိုးပြီး ပညာတတ်ကြီးသဖွယ်ဖြစ်လာခဲ့တယ်။ အစ်ကို့သမီးလေး "အင်ကြင်း"ကိုပိုက်ထွေးရင်း အစ်ကို့ကိုလည်း အချစ်ပိုရရင်း အမည်းစက်တွေကိုလည်း ဖုံးရင်း ဖိရင်း...။

ဒါပေမဲ့... အစ်ကိုဟာလည်း နေ့ညိုအမာရွတ်ကြီးကို မြင်သွားတဲ့အခါမှာတော့...။

ဗိုင်းကောင်းကျောက်ဖိနေခဲ့တော့ လူစော်ကားခံရတယ် . . . သားကိုသခင် လင်ကိုဘုရား ကိုးကွယ်ဆည်းကပ်ပြန်တော့ လင်ပစ်ခံရတယ် . . .ဆိုတဲ့နေညိုရီ။

ဒီနေညိုရီဟာလည်း လောကဓံရဲ့ အထုအထောင်းတွေအောက် ပြားပြားမှောက်မလာဘဲ မိန်းမလည် သိန်းကြွယ်ဖြစ်လာတော့တယ်။

သမီးလေးကို‌ခေါ်သွားတဲ့ ဖေဖေလဲဆုံး သမီးလေးကိုစောင့်‌ရှောက်နေတဲ့ ဖွားဖွားလဲဆုံးတော့ အမျိုးတွေဝိုင်းကျဉ်တာကိုခံနေရတဲ့ မိန်းမပျက်မရဲ့သမီး အင်ကြင်းလေးကို အဆိပ်သင့်နေတဲ့ ရင်ခွင်တစ်စုံနဲ့ ဘယ်လိုကာကွယ်သွားမလဲဆိုတာကိုတော့....။

_

ဆရာမ‌နေနွယ်ဇင်မြင့်ရဲ့ အဆိပ်သင့်မေမေစာအုပ်ဟာ ကာရန်လွဲမေတ္တာဆိုတဲ့ခေါင်းစဉ်နဲ့ ဇာတ်ကားပြန်ရိုက်ပြီးသားဖြစ်ပါတယ်။ ဇာတ်ကားထဲမှာလည်း ရုပ်ရှင်သရုပ်ဆောင်တွေအားလုံးဟာ သူ့နေရာနဲ့သူ အပီပြင်ဆုံးသရုပ်ဆောင်ထားပြီးသားပါပဲ။ ဒါပေမဲ့ စာအုပ်ဖတ်ရတဲ့အရသာနဲ့ ရုပ်ရှင်ကြည့်ရတဲ့အရသာ အပုံကြီးကွာတာကို စာချစ်သူတွေအနေနဲ့ အထူးပြောစရာလိုမယ်မထင်ပါဘူးရှင်။ ဒါကြောင့် စာအုပ်ဖတ်ကြည့်ကြဖို့လည်း တိုက်တွန်းလိုက်ရပါတယ်ရှင်။

#နေနွယ်ဇင်မြင့် #အဆိပ်သင့်မေမေ #Review_by_NuNu