ထင်လင်း

ရွှေဘိုခရိုင် ရေဦးမြို့နယ် ညောင်လယ်ရွာ၌ အဖမြေတိုင်းစာရေးကြီး ဦးဘိုးပေါ် ၊အမိဒေါ်လှတို့ မေလ ၉ရက် ၁၉၁၉တွင်မွေးဖွါးသည်။ မွေးချင်း ၄ယောက်မြောက်ဖြစ်၍ အမည်ရင်းမှာ ဦးသိန်းမောင်ဖြစ်သည်။

ငယ်ရွယ်စဉ်က ညောင်လယ်ရွာ ဘုန်းတော်ကြီး ဦးကြာစိကျောင်း၌ စတင်ပညာသင်ယူသည်။ ၁၉၂၉-၃၀ ထန်းတပင် ဇီးကုန်း ဦးသာဂျမ်း အလယ်တန်းကျောင်း၌ လေးတန်းအထိ၊ ၁၉၃၀-၃၁တွင် ရေဦး အင်္ဂလိပ်-မြန်မာ အလယ်တန်းကျောင်း၊၁၉၃၁-၃၉တွင် ရွှေဘို အက်စ်ပီဂျီ သာသနာပြုကျောင်း၌ ဆက်လက် ပညာသင်ယူသည်။ ၁၉၃၉တွင် ဆယ်တန်းအောင်သည်။ ၁၉၄၇တွင် ရန်ကုန်တက္ကသိုလ်သို့ တက်ရောက်ဆည်ပူးပြီး ၁၉၅၂ တွင်ဝိဇ္ဇာဘွဲ့ ၊ ၁၉၅၄တွင် ဥပဒေဘွဲ့ ရရှိခဲ့သည်။

၁၉၃၉- ၄၇ တွင်ရွှေဘိုအရေးပိုင်ရုံး၌ စာရေး၊ ကန့်ဘလူနယ်ပိုင်ရုံးတွင် ဒုတိယစာရေး ၊ ကန့်ဘလူမြို့ပိုင်ရုံးတွင် စာရေးကြီး၊ထို့အပြင် တန့်ဆည် ခင်ဦး၊ဝက်လက် စသဖြင့် ပြောင်းရွေ့အမူထမ်းရသည်။ ၁၉၄၈တွင် စာပေဗိမ္မာန်၌ စာပြု၊ ၁၉၄၉-၅၄တွင် စာပေဗိမ္မာန်၌ လက်ထောက်စာတည်း၊ ၁၉၅၄-၅၅တွင် တက္ကသိုလ် ဘာသာပြန်စာအုပ်နှင့် စာအုပ်ထုတ်ဝေရေးဌာန၌ လက်ထောက်စာတည်း၊ ၁၉၅၅-၅၉တွင် ရနကုန်တက္ကသိုလ် အင်္ဂလိပ်စာဌာန၌ နည်းပြအဖြစ်အမူထမ်းပြီး မဟာဝိဇ္ဇာတန်း ဆက်တက်သည်။ ၁၉၅၉တွင် မင်းယုဝေနှင့်တွဲဖတ်၍ ငွေတာရီ မဂ္ဂဇင်းနှင့် ငွေတာရီစာစဉ်တည်ထောင်ပြီး ငွေတာရီမဂ္ဂဇင်း အယ်ဒီတာချုပ်၊ ငွေတာရီစာစဉ် တွဲဖက်အယ်ဒီတာ အဖြစ်တာဝန်ယူသည်။ ၁၉၆၁မှစ၍ ဦးခင်မောင်လတ်နှင့်အတူ အလွတ်ပညာသင်ကျောင်းဆရာအဖြစ် အသက်မွေးဝမ်းကြောင်းပြုခဲ့သည်။

၁၉၆၁ တွင်အမေရိကန်ပြည်ထောင်စုသို့ လေ့လာရေးခရီးအဖြစ် ၄လသာမျှ သွားရောက်ခဲ့သည်။ ထိုခရီးမှအပြန်တွင် ဂျပန်သို့ဝင်၍ ယူနတ်စကိုအကူအညီဖြင့် စာအုပ်ထုတ်ဝေရေးလုပ်ငန်းများကိုလေ့လာခဲ့သည်။ ၁၉၉၀တွင်အိန္ဒိယနိုင်ငံ ဘုံဘေမြို့အနီး အီဂတ်ပူရိရှိ ဓမ္မဂီရိကုန်းမြေ၌ ကျင်းပသော အပြည်ပြည်ဆိုင်ရာ ဝိပဿာနာနှီးနှောဖလှယ်ပွဲသို့ တက်ရောက်ပြီး ဝိပဿာနာဘာဝနာစာတမ်းကို ဖတ်ကြားခဲ့သည်။

၁၉၄၇ မှစ၍ စာနယ်ဇင်းများတွင် ဆောင်းပါး၊ဝတ္ထု၊ ကဗျာများကို အင်္ဂလိပ်၊မြန်မာ ၂ဘာသာဖြင့် ရေးသားသည်။

၁၉၄၇တွင် တာရာမဂ္ဂဇင်း၌ နယ်ပိုင်ဦးထုပ် (ဝတ္ထု)ကို သိန်း(အညာ) ကလောင်အမည်ဖြင့် ရေး၍ စာပေလောကသို့ စတင်ဝင်ရောက်သည်။

၁၉၄၈ တွင်ပဒေသာမဂ္ဂဇင်း၌ ထင်လင်း အမည် စတင်ခံယူသည်။

မဟေသီ (၁၉၅၃)၊ အလီဘာဘာ၏ဂူနှင့်အခြားစုံထောက်ဝတ္ထုများ၏တက္ကသိုလ် ဥပစာတန်း ပြဠာန်းအင်္ဂလိပ်စာ ဘာသာပြန်)၊ မောဂ္ဂလိ(၁၉၇၄)၊ စည်းအပြင်ကလူ(၁၉၇၄)၊ မေတ္တာရှင်မလေးပေါ်လီယာနာ(၁၉၇၄)၊ တကျွန်းစံ၏အပြန်လမ်း(၁၉၇၆)၊ ပလိပ်(၁၉၇၇)၊ အဆိပ်(၁၉၈၁ စသည့်တို့ကိုဘာစာပြန်ခဲ့သည်။

မြစိမ်းရောင်ရင်ခွင်သို့အပြန်(၁၉၇၅)၊ဘယ်ဆီဘယ်ဝယ်(၁၉၇၆)၊ စောင်းကြိုးတင်းသည့်သီချင်းသံဝတ္ထုတိုများ(၁၉၇၇)၊ချစ်သူရင်ခွင်ထက်၌အိပ်စက်ခြင်း(၁၉၄၄)၊ထင်လင်းပုံပြင်(၁၉၉၉)တို့ကို ရေးသားခဲ့သည်။

မောဂ္ဂလိ ဖြင့် ၁၉၄၇ အမျိုးသားစာပေ ဘာသာပြန်စာပေဆု၊ လယ်တောမှအပြန်နျင့်လက်ရွေးစင်ဝတ္ထုတိုများ ဖြင့် ၁၉၉၁တွင် အမျိုးသားစာပေတ္ထုတိုပေါင်းချုပ်ဆု ရရှိခဲ့သည်။

၁၉၉၆ခုနှစ် ဇွန်လ ၃၀ရက်တွင် ရန်ကုန်မြို့၌ ကွယ်လွန်သည်။